BAHAN EVANGGELIUM “ Bernyanyilah Bagi Tuhan/ Marende Ma Hamu Di Debata” Ev. 2 Musa 15 : 19 - 21

November 09, 2022

  

BAHAN EVANGGELIUM 

“ Bernyanyilah Bagi Tuhan/ Marende Ma Hamu Di Debata”

Ev. 2 Musa 15 : 19 - 21

I.                   Patujolu

SAHALAK pangarang lagu na tarbarita mandok, ”Hatahata mangkorhon tu pingkiranta. Musik, mangkorhon tu pangkilalaanta. Alai ende, mangkorhon tu pingkiran dohot tu pangkilalaanta.” Jadi, molo marende hita mamuji Jahowa, on patuduhon holongta jala mambahen hita lam jonok tu Ibana. I do alana, mansai ringkot do marende laho mamuji Jahowa, tingki sahalakta manang tingki rap dohot angka dongan. Songon dia do pangkilalaanmuna tingki marende di parpunguan? Maila do hamu? Di pigapiga inganan, maila do angka baoa marende di jolo ni na torop. Boi do on mangkorhon na roa di huria. Tarlumobi, molo maila angka sintua, manang diulahon nasida ulaon na asing tingki marende di parpunguan.Mansai ringkot do marende mamuji Jahowa. Alani i,  unang be mardalani hita molo dung dipungka marende di parpunguan. Tasungkun ma di rohanta, ’Songon dia do pangkilalaanku tingki marende di parpunguan? Aha do na boi huulahon asa unang maila marende? Jala, songon dia do cara marende sian nasa roha?

II.                Hatorangan

Sian najolo, dipangke naposo ni Jahowa do musik laho mamuji Debata. Andorang so manimbil halak Israel, diharingkothon nasida do marende laho mamuji Jahowa. Umpamana, tingki laho pajongjongkon bagas joro, diatur si Daud do 4.000 halak Lepi laho marmusik mamuji Jahowa. Jala 288 halak sian nasida ”pande di parendeon tu Jahowa”.​—1 Kron. 23:5; 25:7. Ringkot do musik dohot marende di peresmian bagas joro. Songon na dipaboa di Bibel, ’Jadi hira sisada soara begeon halak na marsarune dohot angka na marende laho mamuji dohot mandok mauliate tu Jahowa. Jadi dung dipangiar soara i binahen ni sarune, arbap, dohot angka na asing dohot binahen ni pamujimujion di Jahowa,hamuliaon ni Jahowa manggohi joro ni Debata.’ Tontu dipatogu do haporseaon ni halak Israel di tingki i!​—2 Kron. 5:13, 14; 7:6.Huhut mangaradoti ulaon paulihon tembok Jerusalem, diuluhon si Nehemia do halak Lepi laho marende dohot marmusik. Alani i, gabe tamba do las ni roha ni nasida tingki diresmihon tembok i. Dipillit si Nehemia do ”dua rongkanan” manang dua punguan parende. Marudurudur ma dua punguan i di atas ni tembok. Sada tu siamun, jala na sada nai tu hambirang sahat tu na pajumpang nasida di inganan na jumonok tu bagas joro. Mansai gogo do soara ni nasida marende, tarbege sian na dao. (Neh. 12:27, 28, 31, 38, 40, 43) Tontu las do roha ni Jahowa mangida naposoNa, na marlas ni roha marende mamuji Ibana.

Turpuk jamita on, ay 19-21, I ma ende ni si Meryam, sahalak panurirang boruboru, iboto ni si Aron. Ende ni si Meryam on, I ma pangibulan ni ende si Musa na di ay 1-18. Di ende na pinatomutomu ni si Musa I, dihatidangkon si Musa taringot tu hadirion ni Debata. Di panindangion taringot tu hadirion ni Jahowa, diendehon nasida hagogoon ni Debata na so adong tudosna. Dipahimpu si meryam ma di endena: ndang adong na manahan sian musuNa maradophon Jahowa ay.21. Ndang manahan huaso ni angka na munusai bangsoNa, ai dileksehon do hureta dohot hoda ni parangan ni raja Parao, ay.1-4 Dihuphupi parangan ni Misir i marhite aek, ay.5,8,10,12,19. Tangan siamun ni Jahowa mangaropuhi musu , ay.6, jala tarrimas Jahowa tu musu ni bangsoNa pargogo na so hatudosan do Jahowa, ai holan marhite pangullus ni igungna dileksehon portibi on. Sada panindangion do ende on tu bangso Israel asa holan tu Jahowa nasida marhaposan. Molo adong pe na gogo di  portibi on, ndang margogo i martimbanghon hagogoon ni Jahowa Disosoiminggu, Kantate, dohot jamita on hitu asa manghatindanghon, manghamauliatehon huaso dolhot hagogoon ni Jahowa na pinapatarNa di pardalanan ni portibi on dohot di pardalananta marsadasada. Angka dia ma hamuliaon, huaso dohot hagogoon ni Jahowa na pinapatarNa di pardalanan ni portibi on, dohot di pardalanan ni ngolunta? Marragam alus tusi. Boi do dohononta; hahipason, hagogoon, arta, Sipanganon dohot angka na asing. Di hamamasa ni pandemi covid-19, mamungka sian Maret 2020 sahat tu taon 2022 on, ingkon do hatindanghononta huaso, hamuliaon dohot hagogoon ni Jahowa, na mangaramoti ngolunta. Marhite pandemi covid-19 i disungguli hita manghatindanghon huaso, hagogoon ni Jahowa. Dipatuduhon pandemi i do na so adong manang aha na boi tarbahen jolma paluahon dirina sian wabah i, so holan marsigantung tu Asi ni roha ni Tuhani.

Di angka channel Youl ube, tarbege do angka kesaksian ni torop murtadin (halak Silom naung gabe Kristen). Didok nasida, dihuthon nasida haporseaon ni halak Kristen na hinasogohon nasida i, ala tindakan nyata ni Jahowa. Didok nasida, Debata na mangolu do Jahowa na binaritahon ni Bibel i, na mangula di ngolu ni jolma. Jahowa, i ma Debata na boi dipanghilalahon jolma mangula di ngoluna Na umbalga siendelhononta, i ma haluaonta, haluaon sian musu na pardagingon nang Sian musu ni partondionta po. Taringot tu haluaon do na niendehon ni bangso Israel di turpuk on. Marolopolop nasida marlas ni roha mangendehion haluaonnasida, na pinatupa ni Jahowa. Jahowa do na gabe sungsung parendeonta. Endenta ingkon patubegehon habalgaon ni Jahowa na paluanon hita sian covid-19, dohot sian musu ni haporseaonta.

III.             Sipahusorhusoron

Sitiruon na denggan do halak Kristen di abad na parjolo. Di jabujabu do nasida marpungu laho manomba Jahowa. Nang pe ndang songon uli ni bagas joro jabu ni nasida, alai las do rohanasida marende. Didok apostel Paulus do tu angka dongan di tingki i, ’Masiajaran jala masipaingotan ma hamu marhitehite angka ende psalmen, endeende pujipujian dohot  ende partondion; endehon hamu ma Debata di bagasan rohamuna marroha hamauliateon!’ (Kol. 3:16) Ingkon ”marroha hamauliateon” do hita tingki marende sian buku endenta. Alana, on ma sada cara ni ”naposo haposan jala na marroha”, ”mangalehon [hita] mangan di tingkina”.​Mat. 24:45. Taingot ma, mansai ringkot do marende di panombaonta. On ma caranta patuduhon holong dohot hamauliateonta tu Jahowa di sude basabasaNa. (Jaha Jesaya 12:5.) Molo marlas ni roha hita marende, gabe dohot do donganta marlas ni roha. Sude hita na di huria, na poso, na matua, dohot na baru di hasintongan boi marlas ni roha marende. Alani i, sian nasa roha ma hita marende jala unang ma maila. Ulahon ma hata ni panurat psalmen na mandok, ’Endehon hamu ma ende di Jahowa!’ Alani i, marlas ni roha ma marende!​Ps. 96:1.

Tags : BAHAN KHOTBAH

BPPPWG MENARA KRISTEN

KOMITMEN DALAM MELAYANI

PRO DEO ET EIUS CREATURAM

• PRO DEO ET EIUS CREATURAM
• COGITARE MAGNUM ET SOULFUK MAGNUM
• ORA ET LABORA

INFORMASI KEPALA BPPPWG MENARA KRISTEN

• Nama: Pdt Hendra C Manullang
• Alamat: P.Siantar - Sumatera Utara - Indonesia
• Email: crisvinh@gmail.com
• Email2: menarakristen@gmail.com

/UMUM