BAHAN EVANGGELIUM “ Kuasa Tuhan Yang Membangkitkan/ Huaso Ni Debata Na Pangoluhon" Ev. Ulaon 9 : 36 - 43

November 09, 2022

 

BAHAN EVANGGELIUM 

“ Kuasa Tuhan Yang Membangkitkan/ Huaso Ni Debata Na Pangoluhon"

Ev. Ulaon 9 : 36 - 43

I.                   Patujolo

Adong do sada kegiatan manang ulaon ni huria mulamula i na mambahen lam rarat harajaon ni Debata, i ma visitasi (perkunjungan). Langsung ro mandapothon angka ruas i huhut mangajari dohot patupahon tanda halongangan marhitehite goar ni Tuhan Jesus. Sian huta tu huta do Apostel Petrus patupahon ulaon i gabe lam torop halak angka na mangihuthon Kristus. Uju di huta Lidda dope Apostel i nunga sahat barita tu ibana aha na masa di huta na jumonok tusi i ma huta Joppe. Adong sahalak na margoar Tabita, marsahit laos mate. Hape tarbarita do ibana sahalak na sumurung di angka ulaon na denggan huhut godang mangulahon asi ni roha uju di ngoluna. Alai marhite na masa tu si Tabita naeng marsangap goar ni Tuhan i. Gabe ro ma Apostel Petrus mamereng na masa i huhut mamboan barita las ni roha, marhite huaso ni Tuhan i mulak mangolu do si Tabita. Alani barita i gabe torop do halak na di huta Joppe gabe porsea tu Debata.

II.                Hatorangan Ni Turpuk

Ala haporseaon ni sada halak na porsen tu Jesus Kstus di huita Joppe, tarsunggul rohana manuru dua halak paboahon dohot manjo Si Petrus mamereng na masa i. Nang pe ndang dipaboa di turpuk on, Sangkapnasida paboahon hamamate ni si Tabitha tu si Petrus, asa ro do si Petrus marnida na masa i. Nang pe ndang didok asa dipangolu si petrus si Tabitha, umbahen na dijou ibana, na tangkas dihirim na marsuru i do asa papataron ni si Petrus huaso ni Debata pangoluhon si Tabitha naung mate i. Sasintongna, nunga mangarade sisolhot ni Si Tabitha mamboan Si Tabitha tu udean. Pandohan "jadi diburi ma ibana", di hata Indonesia"setelah dimandikan" (mamuri bangke, memandikan mayat), patuduhon naung mangarade sisolhotna mamboan tu kuburan. Lapatanna, ndang adong be pingkiran ni sisolhotna asa mangolu si Tabitha, hape di namarsuru manjou si Petrus i, adong dope panghirimon mangolu si Tabitha. Alani do disuru manjou si Petrus. Porsea na marsuru i, papataron ni Debata huasoNa pangoluhon si Tabitha naung mate i.

Dung sahat si Petrus tu bagas ni si Tabitha, marroan angka ina namabalu mandapothon si Petrus huhut tumatangis. Dipatuduhon angka ina na mabalu i tu si Petrus ulos dohot abit na pinangke nasida na tinonun ni si Tabitha. Dipatuduhon angka ina na mabalu i paheannasida i tu si Petrus, patuduhon lungun ni rohana di parmate ni si Tabitha dohot sihol ni rohana anggiat dipangolu Debata na hinaporseaan ni si Petrus si Tabitha. Manghirim angka na mabalu i, dohot na marsuru na mangalapi si Petrus I na margogo do si Petrus papatarhon huaso ni Debata pangoluhon si Tabitha. Ndang tarhirim angka ina na mabalu i dohot na marsuru i, di haroro ni si Petrus papatarhon huaso ni Debata na boi pangoluhon na mate. Huaso ni Debata na hinaporseaan ni na marsuru si Petrus dohot na hinaporseaan ni si Petrus dipapatar marhite na pangoluhon si Tabitha, sian hamatean.

Haroro ni si Petrus di huta Joppe papatarhon Jahowa na Binaritahonna. Kehadiran ni si Petrus di jabu ni si Tabitha papatarhon, “Ndang adong na so tarpatupa Debata”, Ala haporseaonna dipapatar ibana huaso ni Tuhani pangoluhon si Tabitha. Songon siihuthon Kristus hita disuru hita papatarhon Jesus marhite pos ni rohanta. Margogo si Petrus pangoluhon si Tabitha, mangalehon las ni roha tu angka ina na mabalu di Joppe, tu na marsuru mangalapi si Petrus dohot tu sisolhot ni si Tabitha, ala haporseaon ni si Petrus dohot na marsuru mangalapi i di Jahowa. Patar di ngolu ni si Petrus pandohan ni Jesus na mandok, "Na marhagogoon do na porsea i patupahon saluhutna", Mark.9,23. I do na tarida di kehadiran ni si Petrus di huta i, margogo ibana papatarhon huaso ni Debata di huta Joppe. Pos ni roha na songon i do dipangido sian hita sihuthon Kristus. Haporseaonta di Jesus, pa-sarhon barita ni Jesus tu na humaling hita, asa torop na porsea di Tuhan Jesus. Molo taparangehon haporseaonta i lam sar ma barita ni Jesus, jala martamba na porsea di Tuhan Jesus. Diigil Tuhanta sian hita asa tapapatar huasoNa na boi pangoluhon na mate, na marhuaso mangalchon las ni roha na humaliang hita. Marhite parsihohotonta di Jesus, patar huaso ni Jesus di portibi on.

III.             Sipahusorhusoron

Parngoluon na songon i do dipangido sian hita di partingkian on, gabe las ni roha, pasupasu hita di halak na loja, na marsitaonon dohot nagale. Asa didai portibi on hasiraonta, Mat.5: 13, ingkon gabe pasupasu hita 1 Musa 12: 2b, jala silehon apulapul di na marsak dohot di na marungkil Gabe sira dohot gabe pasupasu i do hadirionta. Marhite parngoluonta dijou hita mamboan las ni roha tu na humaliang hita. Kehadiranta songon halak Kristen manang didia, di tingki sadihari, dohot di sude na masa ingkon mamboan las ni roha di na humaliang, unang partuktuhan, hagigian manang sihabiaran. Amin

 

Tags : BAHAN KHOTBAH

BPPPWG MENARA KRISTEN

KOMITMEN DALAM MELAYANI

PRO DEO ET EIUS CREATURAM

• PRO DEO ET EIUS CREATURAM
• COGITARE MAGNUM ET SOULFUK MAGNUM
• ORA ET LABORA

INFORMASI KEPALA BPPPWG MENARA KRISTEN

• Nama: Pdt Hendra C Manullang
• Alamat: P.Siantar - Sumatera Utara - Indonesia
• Email: crisvinh@gmail.com
• Email2: menarakristen@gmail.com

/UMUM