BAHAN EVANGGELIUM “ Orang Benar Berseru, Tuhan Menjawab/ Ditangihon Debata Do Joujou Angka Na Porsea” Ev. Psalmen 17: 1-6
BAHAN EVANGGELIUM
“ Orang Benar Berseru, Tuhan Menjawab/ Ditangihon Debata Do Joujou Angka Na Porsea”
Ev. Psalmen 17: 1-6
I. Patujolo
Tingki masa sitaonon na borat di hamu, songon dia do hamu mangadopi i? Disurat do di Bibel, ”Pabotohon hamu ma tu Debata pangidoanmuna”. (1 Tessalonik 5:17; Pilippi 4:6) Disurat do di Bibel, molo martangiang hamu tu Jahowa hilala ma ”dame ni Debata na sumurung sian saluhut roha, i ma mangaramoti angka ateate dohot pingkiranmuna”. (Pilippi 4:7) Boi ma tadapot hadameon ni pingkiran molo tapasahat sude holso ni rohanta tu Debata. Songon na disurat di Psalmen 55:23, ”Sai tu Jahowa ma pasahat parsorionmi, jadi Ibana ma pangoluhon ho.”
Godang do halak mangkilala dame pingkiranna dung martangiang. Asa lam solhot paralealeon ni dua halak, ingkon jotjot do nasida mangkatai. Songon i ma nang hita tu Debata. Debata mandok, ”Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.” (Jeremia 29:12) Tingki mangkatai tu Debata, lam jonok ma hita tu Ibana ”dung i pajonohonna ma” tu hita. (Jakobus 4:8) Bibel paposhon rohanta, ”Donok do Jahowa di sude angka na manjou Ibana.” (Psalmen 145:18) Alani i, lam jotjot hita martangiang tu Debata, lam solhot ma paralealeonta tu Ibana.
II. Hatorangan
Sada pslamen na marrumang tangiang disurat raja Daud, dung songon i godang ni akka hangaluton dohot parukkilon naikkon adopanna, anggiat boi jongjong harajaonna gabe tiruan tu akka harajaon niuluhon ni pomparanna muse, dohot tu akka harajaon di luat na asing di pudian ni arina. Pambonsirina i ma ngoluna mulai sian ditanda si Daud harajaon niuluhon ni raja Saul, dohot akka parukkilon naniaena di pambahen ni raja Saul tu si Daud, ala so lomo roha ni si Saul madabu tu tangan ni si Daud tumpal harajaon i manggantihon raja Saul. Dilele do ibana, dihosomi, sai mangangguki ibana tu Jahowa, ai dirajumi rohana so adong hasalaanna tu raja Saul, jala molo adil Jahowa manimbangi parsoalanna dohot raja Saul, dipastihon raja Daud do ibana na sintong di adopan ni Jahowa Debata (’El). Holan Jahowa na ma dirajumi roha ni si Daud na boi paluahon ibana sian akka tahi ni namanjahati ibana. Nang dung gabe raja si Daud di Hebron, dungkon ni i gabe raja ni sude bangso Israel, tong do godang parukkilon (tantangan) na sampe naeng mangago hosana, na ro sian ruar ni Israel dohot na ro sian tonga-tonga ni keluargana sandiri, dohot sian akka na so setuju si Daud gabe raja ni sude bangso Israel. Si Absalom, anak ni si Daud sandiri, naeng mangago hosa ni si Daud. Halak Palistim tong do sai marmusu-tihus maradophon si Daud. Na so boi do takkupon ni Palistim i si Daud asa pintor tallikannasida. Sian akka parukkilon i, boi do antusan soara ni haporseaon dohot hoihoi ni si Daud tu Jahowa (’El), na dipaandar di psalmen on. Disurat raja Daud Psalmen on ala marningot sude parukkilonna i, jala dibahen ibana psalmen on gabe tangiangna. Marulakulak do psalmen on dibahen gabe tangiangna, ai diboto ibana, Jahowa ’El olo do manangihon tangiangna, jala holan Jahowa do di ibana na gabe pangondian. Dibahen psalmen on gabe bagian ni buku Psalmen asa ganup panjaha mambahen psalmen on gabe tangiangna be, jala dibahen gabe tangiang ni huria di akka kebaktianna, ai taruli hagoon dohot pos ni roha nang asiniroha do akka na mambahen tangiang on gabe tangiangna, jala akka parjahat i diotapi TUHAN asa unang be sai manggugai akka naporsea, siihuthon Yahowa Yeshua Hammasiah (TUHAN Jesus Kristus).
Ayat 1-3 : Diboto raja Daud (parpsalmen) on do na so holan ibana martangiang tu Jahowa. Torop do akka jolma na asing. Haru na naeng mangalatei donganna jolma pe tong do martangiang tu Jahowa, asa diolophon Jahowa late ni rohana, ninna rohana. Musu ni si Daud pe, akka nanaeng manjahati ibana, tong do martangiang tu Jahowa. Martangiang do nang akka halak nasintong manang parpangalaho nasintong manang na mangolu di bagasan hasintongan. Masiasa tangiangna tu Jahowa, hombar tu haporseaon na be dohot tujuanna be. Sada sian akka jolma na sintong na martangiang tu Jahowa do si Daud. Disosoi si Daud asa Jahowa manangihon nasintong, i ma jolma na sintong, parroha nasintong, dohot na mangolu di bagasan hasintongan ni Jahowa. Asa alualu ni si Daud ma dibege Jahowa, unang akka alualau ni jolma na mangalatei si Daud. Alasan ni si Daud mangidohon na songon i, ala akka hata na haruar sian pamanganna manang sian bibirna, ndang adong marisi gabus agia otik, ndang adong pangansion di bagasan akka hata nahinatahon ni si Daud. Tu Jahowa rikkot do tutu pangalaho “sijujur ni ninggor sitikkos ni ari”, tolap ni na martangiang i mampartanggungjawabhon hinasintong ni akka nanidokna, di adopan ni Jahowa, siboto nasa isi ni roha nang ateate.
Akka paragama, manang pangihut ni agama dia pe i, pasti do adong ulaon martangiang tu Tuhan nahinaporseaanna be. Boi dohonon, hira na martanding martangiang do akka paragama i. Diparrohahon be ma di akka nahumaliangna, boha do partangiangon ni akka pangihut ni akka agama na marragam i. Ganup do mandok tikkos partangiangon na binahenna be. Alai tangiang ni ise ma na nialusan ni ganup Debata nasinomba ni ganup namartangiang i? Ganup do agama mangakui, na so denggan tangiang na mangido restu laho mambunu jolma na asing, tu Tuhan na sinomba ni partangiang i, manang asa ditumpaki Tuhanna ulaonna manakko, mangalakkup, margabus, manang korupsi. Molo setan do debata ni na martangiang i, i pe asa disetujui/direstui, jala dioloi pangidoan na songon i. Ianggo Jahowa do Debatana, marmuruk do mambege akka tangiang na songon i.
Ayat 4-6: Maradophon akka hajahaton ni jolma, hombar tu hata sian simakkudapMu, jaga do au taringot tu akka dalan ni siula hakorason (kekerasan). Porlu do bahenon ni jolma sinuaeng on, songon pangalaho ni raja Daud on, i ma mambahen hata ni TUHAN Jesus Kristus gabe pedoman manang patokan ni ngolu dohot panghataionna be. Poda i nunga dilestarihon halak Batak Toba i dibagasan sipasingot on: “Pantun Hangoluan, Tois Hamagoan.” “Dekke ni Sabulan, tonggi jala tabo, diupahon di atas pinggan pasu; akka parhata ni TUHAN, ngoluna tonggi jala tabo, pomparanna gok pasupasu.” Molo naeng hajolmaon on marhasil manesa pangalaho dohot akka ulaon hajahaton nang akka kekerasan (misalna KDRT; napajolo gogo papudi uhum; budaya premanisme manang premanisme agamis; pangarampokon; korupsi; pungutan liar dohot hajahaton na asing), ikkon ma ngolu, pangalaho dohot panghataion ni sude hajolmaon on hombar tu hata/poda ni TUHAN Jesus Kristus na tarsurat di buku nabadia (Bibel) i. Poda na sian Bibel i mandok: “Sihaholongmu do donganmi doshon dirim” (Mat.22:39), jala “Saluhut na pinangido ni rohamu, sibahenon ni halak tu hamu, i ma bahen hamu tu nasida, ai i do pamusatan ni patik ro di hata ni angka panurirang” (Mat. 7:12). "Haholongi hamu ma musu muna; na denggan ma bahen hamu tu na mangkosomi hamu" (Lukas 6:27). Marhite na mangulahon poda ni TUHAN Jesus Kristus on, boi do ndang masa be ragam ni akka hajahaton dohot hakorason (kekerasan) di portibi on.
(Ay.5) Na denggan situtu do adong tekad na songon tekad ni raja Daud on di ganup siihuthon TUHAN Jesus Kristus. Barani manghatahon tu TUHAN Jesus Kristus, na hot do didalani dalan ni Jahowa saleleng ngoluna, jala nang anakkon pe tong hot mandalani dalan i. Nunga didok TUHAN Jesus Kristus: "Ahu do dalan i dohot hasintongan dohot hangoluan. Ndang adong na sahat tu Ama i, ia so marhite sian Ahu" (Yohanes 14:6). Ditonahon Jesus do tu akka pangihutna, asa ganup nasida hot di dalan i: Radoti hamu ma angka patikku; i ma dalanna, asa mian hamu di bagasan holong ni rohangku: Songon Ahu pe na mangaradoti angka patik ni Damang, gabe mian di bagasan holong ni rohaNa" (Yohanes 15:10). Parsihohoton (konsistensi) ni akka pangihut ni Kristus (ruas dohot parhalado ni Huria Kristen) mardalan di dalan napinauli ni TUHAN Jesus Kristus, tung mansai rikkot di portibi on sian najolo sahat tu haroro ni ajal ni hasiangan on, tarlumobi nuaeng on. Parsihohoton mardalan di dalan i do mambahen boi monang huria i maralohon portibi on, jala manghamonanghon portibi on gabe takkas ditoru ni huaso ni TUHAN Jesus Kristus. Marjea do akka na murtad sian dalan na sintong naung pinauli ni TUHAN Jesus Kristus. Haru na sai pinda sekte Huria ni Kristen, ndang siulaon i saboiboina. Asa tolap ni pangihut ni Jesus hot di dalan ni TUHAN Jesus Kristus, ondop ma nasida sude martangiang, jala torus mangalului Jahowa na di banua ginjang i di bagasan Jesus Kristus. Tangiang ni akka na marsihohot mardalan di dalan ni TUHAN Jesus Kristus i, pasti do maralus, jala sian alus ni TUHAN Jesus Kristus dapotan pasupasu na godang nasida di ngoluna dohot di akka pomparanna.
(Ay.6) Nunga marpadan Jahowa (TUHAN) Jesus Kristus, na alusanna do akka tangiang ni akka na marsihohot di dalan ni Jahowa. Songon on do padan ni Jahowa tu bangso na satia tu Ibana: “Molo tung tinggil situtu roham tumangihon soara ni Jahowa, Debatam, mangaringgas roham mangulahon patikna, angka na hutonahon i tu ho sadarion, jadi pabangkiton ni Jahowa, Debatam ma ho tumimbul sian nasa bangso di tano on. Songgop ma huhut tu ho sude angka pasupasuon jala pasahatonna tu ho, molo ditangihon roham soara ni Jahowa, Debatam. Pasupasuonna ma ho di bagasan huta, pasupasuonna ho huhut di ladang. Pasupasuonna parbue ni bortianmi dohot parbue ni tanomi, pasupasuonna ma sinur angka dorbiam, lombum dohot birubirum. Pasupasuonna ampangmu dohot pangudianmu. Pasupasuonna ho laho bongot, jala pasupasuonna ho laho ruar. Pasahaton ni Jahowa do angka musum angka na hehe mangalo ho” (5 Musa 29:1-7a). Diuduti TUHAN Jesus Kristus do padan ni TUHAN i di na didok Ibana: “Sai jumolo ma lului hamu harajaon ni Debata dohot hatigoranna, dung i tambahononna do sude angka ondeng tu hamuna!” (Mat.6:33); “Laos ajari hamu ma nasida mangaradoti nasa hata naung hupatikkon tu hamu. Ai ida ma, sai na dongananku do hamu ganup ari, rasirasa ro ajal ni hasiangan on!” (Mat.28:20). "Angkup ni i hudok ma di hamu: Molo mardos ni roha manang dua sian hamu di tano on tumangiangkon manang hata dia pe, jaloonmuna do i sian Damang na di banua ginjang i" (Matius 18:19). Rade do Jahowa mangungkap sipareonNa (pinggolNa) tumangihon pangidoan ni akka na radot martangiang. Bahkan diaturhon Jesus jala ulahononNa do naung diaturhonNa i: “Alai ia martangiang ho, tu bilut ma ho laho; sordak ma pintu i! Dung i martangiang ma ho tu Amangmu na di na buni, gabe baloson ni Amangmu, na marnida di na buni, ma i tu ho!” (Mat.6.6). “Ai diboto Amamuna do na ringkot di hamuna, andorang so mangido dope hamu.” (Mat.6:8b). Marningot sude padan dohot janji ni TUHAN Jesus Kristus on, ikkon harikkoton ni ganup pangihut ni TUHAN Jesus Kristus ma na martangiang i, mangalului na rikkotna tu parbanuaginjang.
III. Sipahusorhusoron
Tuhan Jesus mandok, ”Ai ise sian hamu jolma, na mangalehon batu tu anakna, molo indahan dipangido? Manang na olo mangalehon ulok, molo dengke dipangido? Gari hamu umboto mangalehon basabasa na denggan tu anakkonmuna, lam Amamuna na di banua ginjang i ma so lehononna arta na denggan di na mangido tu Ibana?” (Mateus 7:9-11) Dipangido Debata do asa martangiang hita tu Ibana ala lomo rohaNa mangurupi jala ”disarihon” do hita. (1 Petrus 5:7) Tapasahat ma sude holso ni rohanta tu Ibana. Disurat di Bibel, ”Unang holsohon hamu agia aha; alai sandok pabotohon hamu ma tu Debata pangidoanmuna marhitehite tangiang dohot elehelek mardongan mauliate!”Pilippi 4:6
Tags : BAHAN KHOTBAH
BPPPWG MENARA KRISTEN
KOMITMEN DALAM MELAYANI
PRO DEO ET EIUS CREATURAM
- PRO DEO ET EIUS CREATURAM
- COGITARE MAGNUM ET SOULFUK MAGNUM
- ORA ET LABORA
- : Pdt Hendra C Manullang
- : P.Siantar - Sumatera Utara - Indonesia
- : crisvinh@gmail.com
- : menarakristen@gmail.com
Post a Comment